निर्वाचन विशेष : सप्तरी क्षेत्र नम्बर १ मा कांग्रेस बलियो हुदै

गामघर डेस्क

राजविराज । पूर्व सांसद डा.सूर्यनारायण यादवले नेपाली कांग्रेसका उम्मेदवारलाई समर्थन गरेपछि सप्तरी क्षेत्र नम्बर १ मा कांग्रेसको चुनावी माहोल बलियो हुदै गएको देखिएको छ।
२०७४ सालको प्रतिनिधिसभा निर्वाचनमा क्षेत्र नम्बर १ बाट निर्वाचित यादवले यसपटक कांग्रेस उम्मेदवार रामदेव साहको पक्षमा खुलेर समर्थन जनाएका हुन्। उहाँले साहका लागि मत माग्न सुरु गर्नुका साथै घरदैलो कार्यक्रममा समेत सक्रिय सहभागिता जनाइरहेका छन्।
डा. यादवले कांग्रेस परिवर्तनको दिशामा अघि बढेको र मधेशको मुद्दालाई सम्बोधन गर्ने नीति लिएको बताउँदै सोही कारण आफू समर्थनमा उभिएको बताउनु भयो ।
यसैबीच नेकपा (एमाले) परित्याग गरेका पूर्वमन्त्री जितेन्द्रनारायण देव पनि नेपाली कांग्रेसमा मगलवार प्रवेश गरेका छन्। उहाँलाई कांग्रेसका जिल्ला सभापति रामदेव साह, उपसभापति रामकुमार यादव, सचिव सनतकुमार मण्डल र राष्ट्रियसभा सदस्य रञ्जित कर्णले फूलमाला र अविर लगाएर पार्टीमा स्वागत गरेका थिए।
देवले केही दिनअघि सप्तरीमा पत्रकार सम्मेलन गरी एमाले परित्यागको घोषणा गरेका थिए। राष्ट्रियसभाको पदावधि सकिएपछि पुनः एमालेमा प्रवेश गरेका उहाँ यसपटक कांग्रेसमा आबद्ध भएका हुन्। कांग्रेसका उम्मेदवारलाई समर्थन र कांग्रेसमा प्रवेशको कारण सप्तरीमा कांग्रेसको संगठनात्मक र चुनावी सक्रियता बढेको देखिएको छ।

प्रकाशित मिति: २०२६-०२-१८ , समय : ०७:२०:४८ , 22 hours अगाडि