मधेस प्रदेश : आनन्दीदेवी मृत्यु प्रकरणमा छानबिन समितिद्वारा अनुसन्धान शुरू

गामघर डेस्क

सिरहा । मधेस प्रदेशको सिरहाको नवराजपुर गाउँपालिका–३ जगतपुर फुलबरीया मुसहरी टोलकी आनन्दीदेवी सदायको मृत्यु प्रकरणमा प्रहरीको छानबिन समितिले विस्तृत अनुसन्धान शुरू गरेको छ ।

गएको पुस ९ गते गाउँकै दुई युवकद्वारा भएको यौन दुव्र्यवहार घटनामा न्याय नपाएपछि वैशाख २ गते सदाय आफ्नै घरमा झुन्डिएको अवस्थामा मृत भेटिनुभएको थियो ।

यस घटनाको सुक्ष्म अनुसन्धानको लागि गृहमन्त्री रमेश लेखकको निर्देशनबमोजिम गएको बिहीवार मधेश प्रदेश प्रहरी कार्यालय, जनकपुरका प्रहरी वरिष्ठ उपरीक्षक शान्तिराज कोइरालाको नेतृत्वमा तीन सदस्यीय छानबिन समिति गठन भएको थियो ।

समितिले हिजो पीडितको घरमा पुगी परिवारसँग सोधपुछ गरेको छ । घटनामा प्रहरीले कमजोरी गरेको भन्ने विषयमा इलाका प्रहरी कार्यालय, महेशपुर पतारीका प्रहरी कर्मचारीसँग आवश्यक जवाफ लिने काम भएको प्रहरी वरिष्ठ उपरीक्षक कोइरालाले जानकारी दिनुभयो ।

माइतीघरमा बस्दै आएकी २४ वर्षीया सदायलाई स्थानीय २२ वर्षीय सञ्जिव यादव र ३२ वर्षीय श्यामसुन्दर यादवले यौन दुव्र्यवहार गरेको घटना सार्वजनिक भएको थियो ।

त्यही दिन इलाका प्रहरी कार्यालय, महेशपुर पतारमा जाहेरी दिए पनि आरोपित पक्ष र प्रहरीले पीडितलाई गाउँमै मिल्न दबाब दिएको पीडित पक्षको आरोप छ ।

पछि जिल्लाका मानव अधिकारकर्मीसहितको दबाबमा गएको फागुन २५ गते जबरजस्ती करणी उद्योगमा जाहेरी दर्ता भएको थियो । आरोपितहरू अझै फरार रहेका छन् । रासस

प्रकाशित मिति: २०२५-०४-२१ , समय : ११:३४:०३ , 5 days अगाडि