कोशी प्रदेश : लागुऔषध मुद्दामा कैद भुक्तान गरिरहेका एक कैदीको मृत्यु

गामघर डेस्क

विराटनगर । लागुऔषध मुद्दामा जिल्ला कारागार मोरङमा सजाय भुक्तान गरिरहेका १ जना कैदीको उपचारका क्रममा मृत्यु भएको छ । कारागारका जेलर गौरव ढुङ्गेलले मोरङको सुनवर्षी नगरपालिका–२ का २४ वर्षीय उमेश दर्जीको मृत्यु भएको जानकारी दिए ।
लागुऔषध मुद्दामा दोषी ठहर भएर सजाय भुक्तान गरिरहेका दर्जीको उपचारका क्रममा मोरङको बुढीगंगास्थित विराट शिक्षण अस्पतालमा मङ्गलवार साँझ मृत्यु भएको उनले बताए ।

उनका अनुसार ज्वरो आउने र खुट्टा सुन्निने समस्या भएपछि दर्जीलाई उपचारका लागि जेठ ३० गते कोशी अस्पताल भर्ना गरिएको थियो । कोशीमा सम्भव नभएपछि थप उपचारका लागि असार ३ गते विराट शिक्षण लगियो ।

लामो समयदेखि उपचाररत दर्जीको स्वास्थ्य अवस्थामा सुधार भएन । उपचारकै क्रममा साँझ ७ः५० बजेतिर मृत्यु भएको जानकारी कारागारले दिएको छ । लागुऔषध मुद्दामा कसुरदार ठहर भएका दर्जी २०८१ पुस ४ गतेदेखि कारागारमा थिए । उनलाई जिल्ला अदालत मोरङले ५ वर्ष २ महिना कैद र ७ हजार रुपैयाँ जरिबाना हुने फैसला गरेको थियो । मृतकको शव जिम्मा लगाउन परिवारसँग समन्वय भइरहेको जेलर ढुङ्गेल बताउँछन् ।

प्रकाशित मिति: २०२५-०६-२५ , समय : ११:१७:०१ , 2 months अगाडि