सप्तरीमा जसपाको विरोध जुलुस : उपेन्द्र यादवलाई पक्राउ गरेको दिन गृहमन्त्री र प्रधानमन्त्रीले राजिनामा दिनुपर्ने दावी

देबराम यादव

राजविराज ।
जनता समाजवादी पार्टी नेपालका केन्द्रीय प्रवक्ता एवम् मधेस प्रदेशसभा सदस्य मनिष सुमनले उपेन्द्र यादवलाई पक्राउ गरेको दिन गृहमन्त्री र प्रधानमन्त्री दुबैजनाले राजिनामा दिनुपर्ने दावी गरेका छन् । जनता समाजवादी पार्टी नेपाल सप्तरी निर्वाचन क्षेत्र नम्बर ३ द्वारा सप्तरीको पत्थरगाढामा शनिबार आयोजित कोण सभालाई सम्बोधन गर्दै केन्द्रीय प्रवक्ता सुमनले सो कुरा बताएका हुन् ।
केन्द्रीय प्रवक्ता सुमनले भूमि सम्बन्धि विधेयक मधेशको हित विपरीत भएको बताउदै भूमि सम्बन्धि विधेयक राष्ट्रियसभाबाट पारित नहुने दावी गर्नु भयो ।
उहाँले पार्टी अध्यक्ष उपेन्द्र यादवले भूमि सम्बन्धि विधेयक विचौलिया र चुरे विनाश गर्ने भु–माफियाको डिजाइनमा ल्याएको र यथास्थितिमा समर्थन जनाउन नसक्ने भनेपछि निसाना बनाइएको आरोप लगाउनु भयो । राजनीतिक प्रतिशोध साध्न कतै संलग्न नभएको अध्यक्षको नाम मुछेर गौरघटनामा छानबिन गर्ने परमादेश प्रधानमन्त्री केपी ओलीकै योजनामा आएको जिकिर गर्नु भयो ।
गौरघटनालाई लिएर अध्यक्षलाई पक्राउ गर्ने दुस्साहस गरे मधेस र देश ठप्प पार्ने चेतावनी दिदै केन्द्रीय प्रवक्ता सुमनले राष्ट्रिय अध्यक्षलाई राज्यले नियन्त्रणमा लिएको दिन गृहमन्त्री र प्रधानमन्त्री दुबैजनाले राजिनामा दिनुपर्ने बताउनु भयो ।
यसैगरी राष्ट्रिय सभा सदस्य पूजा चौधरीले भूमि सम्बन्धि विधेयक राष्ट्रिय सभाबाट पास हुन नदिने बताइन् । उहाँले राष्ट्रघाती विधेयकको विपक्षमा उभिदा पार्टी अध्यक्षमाथि षड्यन्त्र सुरुभएको भन्दै यसका लागि कडा प्रतिकार गर्नुपर्नेमा जोड दिइन् ।
डाकेश्वरी नगरपालिका अध्यक्ष लक्षणदेव साहको अध्यक्षता आयोजित कोणसभालाई सम्बोधन गर्दै केन्द्रीय सदस्य एवम् मधेस प्रदेशसभा सदस्य किरण कुमारी साह, केन्द्रीय सदस्य डा. बबी सिंह यादव लगायतले भुमि विधेयक अगाडि बढाएको भन्दै आक्रोश पोखेका थिए ।
जसपा नेपालले पहिलो चरणको आन्दोलन अन्तर्गत सप्तरीको ४ वटै क्षेत्रमा विरोध प्रदर्शन तथा कोणसभा सम्पन्न गरेको तथा भदौ १६ गते सदरमुकाम राजविराजमा विशाल प्रदर्शन तथा विरोधसभा आयोजना गरिने जसपा नेपाल सप्तरीका सचिव निरज झाले जानकारी दिनु भयो ।

प्रकाशित मिति: २०२५-०८-३० , समय : २२:२६:०३ , 10 hours अगाडि