दाइजो कारण सप्तरीमा पुनः एक महिलाको हत्या : विवाहको दुई महिनामै दीपाको शंकास्पद मृत्यु

देबराम यादव

राजविराज । पछिल्लोपटक सप्तरी सहित मधेस प्रदेशका जिल्लाहरुमा दाइजोका कारण पटकपटक महिलाको हत्या हुने गरेको छ । साेहि क्रममा सप्तरीको महादेवा गाउँपालिका–१ सोनरा लवटोलिया टोलमा दुई महिनाअघि विवाह भएकी २१ वर्षीया दीपाकुमारी यादवको शंकास्पद मृत्यु भएको छ । दुई महिनादेखि उहाँलाई पति २५ वर्षीय दिपककुमार यादव र ससुरा परशुराम यादवले गालीगलौज गर्दै थप दाइजो ल्याउन तनाब दिँदै आएका थिए।
गत शुक्रबार दिपकले दीपाकी भाउजु डाक्नेश्वरी नगरपालिका–४ भुतहीकी सुजितालाई फोन गरेर अर्को विवाह गर्छु भनी धम्की दिँदै दीपालाई लैजान भनेका थिए । त्यसलगतै पटक–पटक अबेर रातिसम्म फोन फर्काउँदा पनि कसैले फोन नउठाएको सुजिताले बताइन् ।
शनिबार सोनरा लवटोलिया टोलभन्दा छेउको गाउँमा फोन गर्दा उनीहरुको घरमा विवाहपछि झै–झगडा हुँदै आएको विषय थाहा पाएपछि सोनरा लवटोलियाका लागि निस्किँनै लाग्दा दीपालाई अस्पताल ल्याएको कुरा जानकारीमा आएको उहाँले बताइन् । बिरामी परेको भन्दै पति दिपक र ससुरा पर्शुरामसहितकाले शनिबार दीपालाई गजेन्द्रनारायण सिंह अस्पताल राजविराज ल्याएका थिए । उहाँको अस्पताल ल्याउनुअघि नै मृत्यु भइसकेको अस्पतालका निमित्त मेडिकल सुपरिन्टेन्डेन्ट डा.दिलिपकुमार साहले सञ्चारकर्मीलाई जानकारी दिनु भयो ।
दीपाको शव अस्पतालको शवगृहमा राखिएको छ भने उहाँका परिवारले दीपाको हत्या भएको भन्दै प्रहरीमा जाहेरी दिएका छन् । ‘असार ४ मा विवाह हुँदा हामीले सकेजति दाइजो दिएकै हो तर विवाहपछि पनि थप दहेज माग्दै थियो,’ दीपाका ठुलो बुवा भगवतीप्रसाद यादवका अनुसार भाइ संजिव वैदेशिक रोजगारी गरेर ती बेला २५ लाख रुपैयाँ खर्च गरेकोले थप दहेज दिनसक्ने अवस्था नरहेको बताउनु भयो ।
दाइजो नदिँदा दिपक र परशुराम मिलेर योजनाअनुसार दीपाको हत्या गरेको उहाँको आरोप छन ।सप्तरी प्रहरीका प्रवक्ता प्रहरी नायव उपरीक्षक जितेन्द्रकुमार बस्नेतले घटना शंकास्पद रहेको भन्दै अनुसन्धानका लागि मृतकका पति र ससुरालाई नियन्त्रणमा लिएको बताउनु भयो । उहाँले ‘घाँटीमा निलडाम पनि देखिएको छ अनि सुरुमा उनीहरुले प्रहरी वा दीपाका परिवारलाई जानकारी समेत नगराएको बताउदै शव पोस्टमार्टमका लागि विपी कोइराला स्वास्थ्य विज्ञान प्रतिष्ठान पठाएको बताउनु भयो ।

प्रकाशित मिति: २०२५-०८-३१ , समय : १७:२८:५० , 4 hours अगाडि