पूर्वाधार अभावले सप्तरीका क्रिकेट खेलाडीहरू अभ्यासबाट बन्चित

गामघर डेस्क

राजविराज ।
सप्तरीमा क्रिकेट खेलको गतिविधि सक्रिय भईरहँदा पूर्वाधार अभावले खेलाडीहरू अभ्यास गर्नबाट बन्चित भएका छन् । क्रिकेट प्रतियोगिता गर्न राजबिराज स्थित पविमाबि क्रिकेट खेल मैदान भएपनि खेलाडीहरूको लागी अभ्यास गर्न नेट पिच नहुँदा खेलाडीहरू नियमित अभ्यास गर्नबाट बन्चित भएका हुन् ।
नेट पिच नहुँदा अभ्यास गर्न समस्या भोग्नु परेको सप्तरीका राष्ट्रिय खेलाडी अमित यादब बताउनुहुन्छ । उहाँले पिच बनाउन सहयोग गरी नियमित अभ्यास गर्नका लागि पूर्वाधार निर्माण गरि दिन सम्बन्धित सरोकारवाला निकाय तथा सरकारसंग समेत माग गर्नु भएको छ ।
आवश्यक पूर्वाधार नहुदाँ खेलाडीहरू अभ्यास गर्न बन्चित मात्र नभई प्रतियोगिताहरूमा सहभागिता जनाउन राम्रो अभ्यास नहुदाँ राम्रो खेलाडीले पनि उत्कृष्ट प्रदर्शन गर्न नसकिने पुर्व राष्ट्रिय खेलाडी पवन दासले बताउनु भयो । उहाँले अहिले अभ्यासका लागि पविमाबि क्रिकेट खेल मैदानको दक्षिण साईडमा खेलाडीहरूले आफनै श्रमवाट नेट अभ्यास पिच बनाउने काम सुरू गरेको बताउनु भयो ।
‘सप्तरी क्रिकेट सँघ र केही खेल प्रेमीहरूले पिच निर्माण गर्न सहयोग गर्नु भयो तर त्यो सहयोगवाट प्रयाप्त नभएको खेलाडी अमित यादबले भन्नु हुदै ’पिच सम्पन्न गर्न ईट्टा, वालु, सिमेन्ट तथा लेवरको खर्च अभाव देखिएकोले सहयोग गरिदिन सरोकारवालासंग अनुरोध गर्नु भयो । ‘
सप्तरी क्रिकेट सँघका सचिव चन्दनकुमार यादबले खेलाडीहरूको लागी नियमित अभ्यास गर्न नेट पिचको अभाव रहेको बताउनु भयो । उहाँले खेलाडीहरू अभ्यास गर्नवाट बन्चित हुने गरेकोले अभ्यास गर्न नेट पिच निर्माण कार्यमा सबैले सहयोग गर्नुपर्नेमा जोड दिनु भयो ।
पविमाबि खेल मैदानलाई राष्ट्रियस्तरको क्रिकेट खेल मैदान बनाउन सप्तरी क्रिकेटको पहलमा मधेश प्रदेश सरकारले साईड स्किन, टर्फ पिच, खेलाडी पेविलियन जस्ता पुर्वाधार निर्माण कार्यहरू सम्पन्न भएको सप्तरी क्रिकेट सँघका सचिव यादबले जानकारी दिनु भयो ।

प्रकाशित मिति: २०२५-११-२३ , समय : ०८:१३:५३ , 1 week अगाडि