सप्तरीको राजविराजस्थित महेन्द्र विन्देश्वरी क्याम्पसमा तालाबन्दी

गामघर डेस्क

राजविराज ।
सप्तरीको राजविराज स्थित महेन्द्र विन्देश्वरी बहुमुखी क्याम्पसको शिक्षा शास्त्र संकाय र परीक्षा शाखामा शुक्रवार तालाबन्दी गरेका छन् । गत बिहीबार बीएड चौथो वर्षको नतिजामा सबै विद्यार्थीलाई प्रयोगात्मक परीक्षामा अनुपस्थित देखाएपछि उनीहरु आक्रोशित भएर तालाबन्दी गरेका हुन् । शिक्षा शास्त्र संकायका प्रमुख रामअषिश यादव र परीक्षा शाखाका प्रमुख चन्देश्वर यादवको स्वार्थ पूरा नहुँदा प्रयोगात्मक परीक्षाको अंक समावेश नगराएको स्वतन्त्र विद्यार्थी युनियन राजविराज क्याम्पसका सभापति रञ्जितकुमार यादवको आरोप छन ।
सभापति यादवका अनुसार बाध्य भएर दुवै शाखामा तालाबन्दी गर्नु परेको बताउदै नतिजामा अंक समावेश नगराएसम्म तालाबन्दी जारी राख्ने बताएको छ । तालाबन्दीले परीक्षा शाखाका कर्मचारी भित्रै थुनिएका छन् भने विद्यार्थी शाखा अगाडि धर्ना बसिरहेका छन् ।
क्याम्पस प्रमुख सुशीलचन्द्र कर्णले प्रयोगात्मक परीक्षाको अंक समावेश गराउनका लागि समन्वयन भइरहेको बताउनु भयो । बीएड चौथो वर्षमा एक सय ३० जना विद्यार्थी परीक्षामा सहभागी भएका थिए ।

प्रकाशित मिति: २०२५-०८-२९ , समय : १५:५७:२३ , 7 hours अगाडि