भारतको बिहार राज्यमा विधानसभाको दोस्रो तथा अन्तिम चरणको मतदान चल्दै

गामघर डेस्क

काठमाडौं ।
भारतको बिहार राज्यमा विधानसभाको दोस्रो तथा अन्तिम चरणको मतदान आज भइरहेको छ । यो चुनावमा एक हजार तीन सय दुई उम्मेदवारले प्रतिस्पर्धा गरिरहेका छन् । एक सय २२ क्षेत्रमा तीन करोड ७० लाखभन्दा धेरै मतदाता छन् । त्यसमा एक करोड ७४ लाख महिला रहेका छन् ।

मतदानका लागि ४५ हजार तीन सय ९९ मतदान केन्द्र निर्धारण गरिएको छ । चार लाख भन्दा धेरै सुरक्षाकर्मी खटिएका भारतीय सञ्चारमाध्यमले जनाएका छन् । गएको नोभेम्बर ६ तारिख अर्थात् बिहिवार बिहारका १८ जिल्लाको एक सय २१ निर्वाचन क्षेत्रमा पहिलो चरणको मतदान भएको थियो ।

मतदानमा ६५.०८ प्रतिशतले मतदान गरेका थिए । बिहारको विधानसभा चुनावका लागि नेपालसँग जोडिएका पूर्वी जिल्लाका सिमानाकाहरु बन्द गरिएका छन् । आजको मतदानपछि बन्द रहेका सीमा नाका खुला हुनेछन् ।

यता भारतको बिहारमा आज भइरहेको दोस्रो चरणको विधानसभा चुनावलाई लक्षित गरी नेपाल–भारत सीमा नाका बन्द गरिएको छ । मधेश प्रदेशका महोत्तरी, धनुषा, सर्लाही, सप्तरी तथा रौतहटलगायत भारतसँग जोडिएका पूर्वी सिमानाका बन्द भएका हुन् ।

सप्तरीका प्रमुख जिल्ला अधिकारी टुबराज पोखरेलका अनुसार भारतको बिहार राज्यमा विधानसभा चुनावका कारण सप्तरीसँग जोडिएका सीमानाका तीन दिनसम्मका लागि बन्द गरिएको हो । शनिवार रातिदेखि बन्द नाका आजराति १२ बजेपछि खुल्नेछ ।

सीमा बन्द भएसँगै जनकपुरधाम–जयनगर रेल सेवा पनि अस्थायी रूपमा रोकिएको छ । नेपाल रेल्वे कम्पनी लिमिटेडले सीमा बन्द भएका कारण भारतको जयनगरसम्म पुग्ने रेल सेवा स्थगित गरिएको र सीमा खुलेपछि पुनः सेवा शुरु गरिने जनाएको छ । एजेन्सी

प्रकाशित मिति: २०२५-११-११ , समय : ०९:५८:५२ , 3 weeks अगाडि