सप्तरीको गाेरपारकाे मदरसामा व्यापक अनियमितता : खाता रोक्का र छानबिनको माग

निकेश साह

बरमझिया । खाता ‘बन्द’ विवादसँगै गोरपारस्थित मदरसा मोमताजुल उलूममा वर्षौँदेखि वित्तीय अनियमितता, गैरकानूनी चेक भुक्तानी तथा शिक्षा शीर्षकको रकम दुरुपयोग हुँदै आएको आरोपले पनि सप्तरीको कञ्चनरुपमा तनाव थपिएको छ ।
उमर, नजिर, दबुद, नसरुल, अनवर, जमिललगायतका स्थानीयवासीले नगरपालिकामा संयुक्त निवेदन दर्ता गर्दै मदरसाका कयौँ खाता सञ्चालकहरूले गम्भीर त्रुटि र दुरुपयोग गरेका दाबी गरेका छन् । उनका अनुसार कृषि विकास बैंक कञ्चनपुरसहित विभिन्न बैंकमा मदरसाका नाममा खोलिएका खाताहरू सक्रिय रहे पनि शिक्षा शाखाको अभिलेखले शिक्षकहरूले गैरकानूनी रूपमा चेक काटेर नगद लिनु, अन्य व्यक्तिका नाममा रकम निकालिनु जस्ता अनियमितता गरेको आरोप लगाइएको छ ।
२०७४ सालदेखि अहिलेसम्म पुरानै समिति, वर्षौँदेखि निरन्तर दुरुपयोग
निवेदनअनुसार, मदरसामा आठ वर्षदेखि नयाँ व्यवस्थापन समिति गठन गरिएको छैन । पुरानै समिति र केही व्यक्तिहरू मिलेर बजेट दुरुपयोग जारी राखेको आरोप छ । यसअघिका निवेदन, सार्वजनिक सुनुवाइ र गुनासोहरूमा ध्यान नदिइएकोले फेरि निवेदन दिन बाध्य भएको स्थानीयहरूको भनाइ छ ।
विद्यार्थी नभएका कक्षाबाट रकम निकासा
मदरसा कक्षा १ र २ मा थोरै विद्यार्थी रहे पनि कक्षा ५–८ का विद्यार्थीका नाममा ठूलो रकम निकासा गरिएको छ । ती विद्यार्थी वास्तविक रूपमा अन्य विद्यालयमा अध्ययनरत रहेको दाबी छ ।
त्यस्तै, खाजा भत्ता, छात्रवृत्ति, पाठ्यपुस्तकका लागि आएको रकम पनि विद्यार्थीसम्म नपुगी व्यक्तिगत लाभमा खर्च गरिएको स्थानीय आरोप छ ।
जालसाजी बिल–भर्पाई पेश गरेको आरोप
शिक्षा शाखामा कर्ते बिल–भर्पाई, खर्च फुलाएर देखाउने, कागजी प्रमाणमा हेरफेर गर्ने कार्य भइरहेका उल्लेख निवेदनमा छ ।
नागरिकको मागः खाता रोक्का–छानबिन र कानुनी कारबाही
निवेदकहरूले नगरपालिकासँग मदरसा सम्बन्धी सबै बैंक खाता तत्काल रोक्का गर्न, नयाँ व्यवस्थापन समिति गठन गर्न, शिक्षा शाखाले सम्पूर्ण अभिलेख अध्ययन गरी सत्यतथ्य सार्वजनिक गर्न,तथा दुरुपयोगमा संलग्न व्यक्ति वा समूहलाई कानुनी कारबाही गर्न माग गरेका छन् ।
स्थानीय उमरले भने, “हामीले वर्षौँदेखि आवाज उठाइरहेका छौँ । अहिलेसम्म कुनै कारबाही भएन । यसपालि दोषीलाई कारबाही हुनैपर्छ ।”
छानबिन र छलफलको प्रतीक्षा…
मदरसा खाता बन्द, अनियमितता र व्यवस्थापन समितिसम्बन्धी विवादसँगै कञ्चनरुपमा उत्पन्न तनाव आइतबार डिएसपी काफ्लेको रोहवरमा हुने छलफलले कत्तिको समाधान गर्छ भन्ने प्रतीक्षा गरिएको छ ।
स्थानीय समुदायले मदरसामा शैक्षिक तथा आर्थिक पारदर्शिता कायम गर्न सरोकारवालाहरूको ध्यानाकर्षण गराएका छन् ।

प्रकाशित मिति: २०२५-११-२७ , समय : १९:३४:१८ , 3 days अगाडि