सप्तरीमा खुल्यो तस्करीकाे लाइन : प्रहरी प्रशासनकै मिलाेमताेमा खुलेआम तस्करी

गामघर डेस्क

राजविराज । सप्तरीका विभिन्न नाकाबाट व्यापक तस्करी भएको छ। जेनजी आन्दोलनपछिको कडाइले तस्करी रोकिने अपेक्षा गरिएकै बेला सीमावर्ती जिल्ला सप्तरीमा अवैध ओसारपसार भने यथावत रहेको स्थानीयवासीले बताएका छन्। दैनिक रूपमा खाद्य पदार्थ, मदिरादेखि अन्य उपभोग्य सामग्रीसम्म सीमाबाट नियमनविना आवतजावत भइरहेको आरोप उनीहरूको छ।
विशेषगरी रातिको समयमा हुने तस्करी गतिविधि रोक्न नेपाल प्रहरी र सशस्त्र प्रहरी बल तैनाथ भए पनि, केही सुरक्षाकर्मी स्वयं नै तस्करलाई संरक्षण प्रदान गरेको आरोप स्थानीयले लगाएका छन्। “हाम्रा आँखा अगाडि तस्करी हुन्छ, तर सुरक्षा निकायका मानिसहरू मौन बस्छन्,” एक स्थानीय बासिन्दाले नाम नखुलाउने शर्तमा बताए।तस्करी नियन्त्रणका लागि बारम्बार चेकजाँच गरिने घोषणा भए पनि व्यवहारमा कडाइ नदेखिनुले संशय झन् बढाएको छ। सीमावर्ती बस्तीका नागरिकहरू भन्छन् — “भुक्तभोगी सधैं हामी नै, तर तस्कर र तिनलाई बचाउनेहरू सुरक्षित छन्।” सुरक्षाका लागि तैनाथ दुवै सुरक्षा निकायबीच समन्वय कमजोर हुँदा तस्करी रोकथाम प्रभावकारी हुन नसकेको विश्लेषकहरू बताउँछन्। साथै, राजनीतिक हस्तक्षेपका कारण कारबाही प्रक्रियामा ढिलाइ र कमजोरी आउने गरेको उनीहरूको भनाइ छ।

तस्करी नियन्त्रणका लागि पटक–पटक अभियान संचालन गरिए पनि स्थायी परिणाम नदेखिनुले सुरक्षा संयन्त्रको प्रतिबद्धतामै प्रश्न उठाएको छ।सीमान्त क्षेत्रका बासिन्दा भने राजनीतिक संरक्षण र सुरक्षाकर्मीको मिलेमतो हटाएन भने तस्करी नियन्त्रण असम्भव रहेको बताउँछन्। उनीहरूका अनुसार, सीमामा कडाइ घोषणा गरिए पनि व्यवहारमा चेकजाँच कमजोर हुँदा तस्करलाई अनुकूल वातावरण बनेको छ।
सप्तरीको पश्चिमी नाका बेल्हीबाट पिकअप भ्यान र ट्रयाक्टरमा तस्करी हुन थालेको छ। मध्यराति गाउँ सुनसान भएपछि पिकअप भ्यान र ट्र्याक्टरमै सामान लोड गरी भारत–नेपाल ओहोर–दोहोर हुने गरेको छ । सशस्त्रलाई मोटो रकम तिरेर तस्करीको लाइन लिएर कारोबार गर्दै आएको स्रोतले जनाएको छ । ‘बोर्डरमा सशस्त्र प्रहरीको बाक्लो उपस्थितिमा राति घण्टौँ गाडी ओहोर–दोहोर गर्छन्, तर पक्राउ पर्दैनन्, विनाप्रहरीको मिलोमतोमा कहाँ सम्भव हुन्छ र ?’ एक स्थानीयको भनाइ छ । तस्करी नियन्त्रण गर्न बोर्डरमा रहने सशस्त्रले नै लाइन दिएपछि सो क्षेत्रबाट तस्करी सुरु भएको कतिपय स्थानीयको आरोप छ ।तस्करीका लागि रौतहट चौकदेखि नहरको बाटो, चनही चौकदेखि बेल्हीको बाटो र बलान नदी हुँदै दुधैलाको बाटो प्रयोग भइरहेका छन्। दुधैलाबाट लाइन नपाएका तस्करले सप्तरीकै बनैनियाँ, पातोको बाटो प्रयोग गरी तस्करी सुरु गरेका छन् ।
नेपालबाट चाइनिज सुपारी , लसुन, मरिच, मदिरा, ग्याँस लाइटर, स्याउ, कस्मेटिक्स लगायतका समानको भारत निकासी भईरहेको छ, भने भारतबाट धान, चामल, प्याज, हार्डवेयर, मोटर पार्टस्, गुट्खा, सुर्ती, चिनीलगायतका सामान आईरहेको छ ।सप्तरी स्थित छोटी भन्सार रहेका बनैनिया, पातो, राम नगर कोदरकट्टी र बेल्ही नाकाबाट तस्करी भइ माल समानहरु सहजै नेपाल र भारत भित्रिने गर्छन ।बेल्ही, पातो, बोदे बर्साईन, छिन्नमस्ता, नर्घो, स्वर्णपट्टी नाका तस्करीका लागि वढि प्रयोग भईरहेका छन्। त्यसमा पनि पातो र वेलही नाका अझै वढि चल्तीमा रहेको छ । हरेराम यादव, प्रकाश साह र गोपाल गुप्ता अनि सप्तरीका मो. अजिज, मो. सागिर र ओमप्रकाश यादवले प्रहरीसँग मिलेर लाईन खुलाएका छन् । तस्करहरुले ट्याक्टर र ट्रकमा सामान ओसार–पसार गरिरहेका छन् ।भारदह नाकाबाट पजियारले कपडा बुडन मुखियाले सूर्तिजन्य देखि अन्य , पातो सीमावर्ती क्षेत्रबाट अरूण देव यादव कपडा महेश साह रक्सीको तस्करी धन्दा गर्छन् भने अमित साह र सानू यादवले सिराहा नाकाबाट तस्करी गराई सप्तरी सम्म सामान ल्याउं गरको छन् । उनीहरू दुबैले कपडाको पनि ठूलो तस्करी गर्दै आएका छन् ।छिन्नमस्ताको मोहनपुरबाट लसुन, सुपारी, छोकडा, स्याउ, मटर, र मदिरा तस्करीका लागि सुरक्षित नाका भएको
छ ।सप्तरीको गोबरगाढा, कोसीपलार, सीमावर्ती क्षेत्रका दर्जनौं चोर बाटो हुँदै मदिरा, र लसुन तस्करी भएको छ । मदिरा, तस्करीको समान टाउको र मोटरसाइकलको प्रयोग गरेर तस्करी भइरहेको छ । बिओपी सोरनपट्टीबाट तस्करीको लाइन दिएकाहरूमा उमेश साह किराना , महिला समूह किराना , कपडा अनि कस्मेटिक, महेन्द्र साह , बिरेन्द्र यादव रक्सी र कपडा , धुरण साह कपडा , किशोर मण्डल कपडा , सियाराम साह कपडा , रामलाल मण्डल कपडा रहेका छन् । बिओपी पाती क्षेत्रबाट तस्करीको लाइन पाउनेहरूमा तरूणदेव यादव कपडा , मनतोष राई किराना , जितेन्द्र राई किराना र कस्मेटिक , मनोज चौधरी कपडा , कमलेश साह हार्डवेयर र किराना , महेश राई , सुरेन्द्र राई रक्सी र रामविलास यादव कपडा रहेका छन् । नव जनप्रहारबाट

प्रकाशित मिति: २०२५-११-२६ , समय : १५:००:३६ , 5 days अगाडि