सप्तरीका शितलहर प्रभावित दलित विपन्न परिवारलाई राहत वितरण

गामघर डेस्क

राजविराज ।
सप्तरीको हनुमाननगर कंकालिनी नगरपालिकाका विगतमा बाढी र अहिले शितलहरबाट प्रभावित ३ सय ५० दलित विपन्न परिवारलाई राहत वितरण गरिएको छ।
नगर प्रमुख विरेन्द्र माझीको पहलमा हर्ड नेपाल नामक संस्थाबाट उक्त राहत सामग्री वडा नम्बर २ सकरदही र वडा नम्बर ४ गंगापुरका दलित विपन्न परिवारलाई उपलब्ध गराई वितरण गरिएको हो।
विगतमा बाढी र अहिले शितलहरबाट प्रभावित हुनसक्ने विपन्न दलित परिवारको छनौट गरि सकरदहीमा २ सय ९३ र गंगापुरमा ५७ परिवारलाई राहत सामग्री वितरण गरिएको वडा नम्बर ४ का वडाध्यक्ष मौली मण्डलले जानकारी दिनु भयो ।
प्रति परिवारलाई २५ केजी चामल, २ केजी दाल, १ लिटर खाने तेल, म्याट्स, तन्ना, कम्बल, झुल, कोभर बाल्टिन, त्रिपाल, झुल, साबुन सहितका सामग्री प्रदान गरिएको नगर प्रमुख माझीले जानकारी दिनु भयो ।
राहत सामग्री उपलब्ध गराउने एलडिएस च्यारेटिज र पोषण शिक्षा तथा कृषि क्षेत्रमा काम गर्ने हर्ड नेपाल नामक संस्थालाई धन्यवाद दिंदै नगर प्रमुख माझीले आवश्यकताको आधारमा यस्ता कार्यक्रमलाई निरन्तरता दिन आग्रह गर्नु भयो ।

प्रकाशित मिति: २०२५-११-२७ , समय : १७:५९:४३ , 3 days अगाडि