मधेश प्रदेशको नीति कार्यक्रम : हरेक ४ बिघामा एउटा बोरिङ, मधेश आईटी पार्क
जसपा नेपालले बहिष्कार गर्यो मधेस सरकारको नीति तथा कार्यक्रम
मिति: २०२४-०६-१२ , समय : ०९:०३:५२ , गामघर डेस्क
तस्बिर : सामाजिक सन्जालबाट
गामघर डेस्क
जनकपुरधाम। मधेश सरकारले कृषि, शिक्षा, स्वास्थ्य, सडक, खेलकुद, पर्यटन आदि क्षेत्रलाई प्राथमिकतामा राखेर आर्थिक वर्ष २०८१/८२ को नीति तथा कार्यक्रम ल्याएको छ । मंगलबार प्रदेश प्रमुख सुमित्रा सुवेदी भण्डारीले मधेश प्रदेशसभामा नीति तथा कार्यक्रम प्रस्तुत गरिन् ।
कृषि क्षेत्रको प्रवर्द्धनका लागि एक पालिका एक कृषि उत्कृष्टता केन्द्र निर्माण गर्नेदेखि मुख्यमन्त्री घरदैलो स्वास्थ्य सेवासम्मका कार्यक्रम सरकारले ल्याएको छ ।
मुख्यमन्त्री स्वास्थ्य सुधार कार्यक्रम, घुमौ मधेश बुझौ मधेश भन्ने मूल नाराका साथ पर्यटन वर्ष, अटोमेटिक ट्रायल सेन्टर स्थापना, एक क्षेत्र एक पक्की पूलको नयाँ कार्यक्रम पनि घोषणा गरिएको छ ।
यस्तै बरोजगारी समस्या न्यूनिकरणका लागि निर्वाचन क्षेत्र एक रोजगार प्रवर्द्धन केन्द्र, ‘हरेक पालिकामा कृषि विद्युतीकरण, ‘पूर्ण साक्षर मधेश प्रदेश-साक्षरता अभियान, ‘हरेक जिल्लामा पूर्ण सुसज्जित मेडिकल उपकरणसहितको मोबाइल एम्बुलेन्स, ‘हरेक पालिकाको सांस्कृतिक झल्को देखिने माटो पार्क निर्माण गर्ने सरकारको नीति रहेको छ ।
हरेक पालिका एक एग्रोभेट, करोड़ वृक्षारोपण अभियान, मधेश स्वयंसेवक कोर, चुरे संरक्षण तथा पानी रिचार्ज, मधेश प्रिमियर लिग, मधेश इतिहास पार्क, मधेश लगानी सम्मेलन, मधेश वैदेशिक रोजगार प्रशिक्षण कार्यक्रम, मधेश वैदेशिक रोजगार उद्धार केन्द्र, स्किल टेस्ट सेण्टर, प्रादेशिक कृषि औजार केन्द्र, मधेश स्टार्ट अप र इन्नोभेसन सेन्टर, टिच फर मधेश, हरेक ४ बिघामा १ बोरिङ कार्यक्रम, मधेश आईटी पार्क निर्माण गर्ने सरकारको नयाँ कार्यक्रम छ ।
यस्तै प्रशासनिक सुधार र सुशासन, लागू पदार्थ विरुद्ध सचेतना कार्यक्रम, मुख्यमन्त्री सुशासन अनुसन्धान फेलोसिप कार्यक्रम, भिजिट मधेश पर्यटन कार्यक्रम, मुख्यमन्त्री प्राकृतिक विपद बीमा कार्यक्रम र एक पालिका एक कृषि लाइब्रेरी नीति तथा कार्यक्रम रहेको छ । यता जनता समाजवादी पार्टी (जसपा नेपाल)ले मधेस प्रदेश सरकारको नीति तथा कार्यक्रम बहिष्कार गरेको छ । मंगलबार मधेस प्रदेश सरकारको आगामी आर्थिक वर्षको नीति तथा कार्यक्रम प्रदेश प्रमुख सुमित्रा भण्डारीले वाचन गरिरहेकी छिन् ।
जसपा नेपालले मधेस प्रदेश सभाको नीति तथा कार्यक्रम प्रस्तुत गर्ने बैठक बहिष्कार गरेको हो । मंगलबार बसेको कार्यव्यवस्था परामर्श समितिको बैठकमा जसपा नेपालले आफ्नो पार्टीको महाधिवेशन चलिरहेकाले २ दिन पछाडि नीति तथा कार्यक्रम ल्याउन आग्रह गरेको थियो । तर सरकारले जसपा नेपालको प्रस्ताव अस्वीकार गरेपछि नीति तथा कार्यक्रम बहिष्कार गर्नु परेको सो पार्टीका संसदीय दलका नेता तथा पूर्वमुख्यमन्त्री सरोजकुमार यादवले बताए ।
प्रकाशित मिति: २०२४-०६-१२ , समय : ०९:०३:५२ , 11 months अगाडि
