मधेश प्रदेशको मिथिला क्षेत्रमा आज रावण वध उत्सव हुँदै

गामघर डेस्क

काठमाडौं । मधेश प्रदेशको मिथिला क्षेत्रमा विजयादशमीका दिन आज रावण वध उत्सव हुँदैछ । महोत्तरीको मटिहानीमा आज विजयादशमीका दिन रावण वध उत्सव मनाइने भएको हो । श्रीराम मिथिलाका ज्वाइँ हुनुभएको र यहाँकी छोरी सीताको हरणकर्ता भएर पनि रावण वध मैथिलहरूका लागि उत्सव बन्दै आएको मानिन्छ ।

वर्षौंदेखि विजयादशमीका दिन श्रीरामले असुर रावणको सम्हार गर्नुभएको स्मरणमा प्रतिकात्मक रूपमा उत्सव मनाउने परम्परा रहँदै आएको छ । विजयादशमीको दिन बेलुका दश टाउको भएको रावण प्रतिमालाई श्रीरामले चलाउनुभएको तीरले शिरछेदन गरिएको दृश्य देखाएर उत्सव मनाउने परम्परा गरिएको छ ।

मिथिलामा विजयादशमीका दिन देवी विसर्जनसँगै यसै दिन श्रीरामले रावणलाई सम्हार गर्नुभएको विश्वासमा रावण वध उत्सवको परम्परा रहँदै आएको छ । मटिहानीमा ‘वध’ गरेको देखाइने रावणको प्रतिमा भोलिपल्ट बाजागाजासाथ जलाशयमा पुर्‍याइ गहिरो पानीमा विसर्जन गर्ने परम्परा रहेको छ । रासस

प्रकाशित मिति: २०२५-१०-०२ , समय : १४:१७:२६ , 2 months अगाडि